pret'i wowo
dushi drumi dushi
nan di: bo tata ta un choler
bo wela burache
blo bati boka hasi beheit
bela nan tur lo ta
bo ta mi bolo pretu
mi blenchi
barbulet
beyesa di mi bida
bonbiní mi bebi ta
nan di : bo pars’un toteki
pakiko tantu teima
bo ta mama su tentalaria
mi tuturutu
trosh’i trinitaria bo ta
nan ta hasi ko’i kens
kentura nan tur lo tin
nan n‘sa ku bo ta mi korona
kerid’i mi kurason
mi kesitu aw’i koko
nan tur ta kiboka
ketu ketu dushi drumi sosega
nan di: bo boka parse chincha
nan kabes ta chok-chok di chochoria
chambon sigur nan ta
mi chogogo chupabebe
mama su chuchubi chibichibi
chichiribichi richi richi
chichiribichi richi richi
nos ta manda Chiku dundunchi nan tras
drumi dushi drumi
mama su zjozjoli
ser’e wowo pretu
pipit’i tamarein
mama ta zonza
kansa